حدث في مثل هذا اليوم ... الجزء الاول

السبت 19/7/2008
كان اياميها باخد التربيه العسكريه
الواحد كان ينام بعد الفجر يصحي الساعه سابعه صباحا طبعا
ويرجع مفيش نوم غير بعد الفجر
لمدة اسبوعين الواحد زهق زهق اخر حاجه
ومكنش طايق نفسه
لان الواحد بيصحي بدري ومبيستفيدش بحاجه
نروح نقف ساعه وراحه ساعه ونطلع ع المدرج ننام علي رجل صبحي والسلام
والجو حر
ومش بس كده كمان نتيجة الثانويه العامه ظهرت
واخواتي ربنا يكرمهم حققوا نجاح خرافي (بتريق طبعا) وكمان ابويه نزل في الفتره دي
ولما نزل عمل مشاكل
وجت امي تعبت ... وكمان نتيجتي ظهرت وكان ليه تقدير في مادتين مخدتهوش
والواحد كان مخنوق بجد ومش طايق روحه
يمكن اياميها بحت بكلام لناس معينه
مينفعش اقوله ... وماسكينها لي زله (هزار طبعا) كل ما اتكلم نسيت ياد ايام ما كنت بتقول كذا وكذا
المهم الاحداث الرزله دي كوووووولها حصلت في اسبوعين
وتأتي المفاجأه
قالوا لنا في التربيه العسكريه اننا هنروح حفلة تخرج الكليه الحربيه
الدفعه 75 لعام 2008
واخدنا زي يونيفورم معفن
والله العظيم معفن
لو تشوفوني وانا متصور بيه هتكرهوني
عامل زي المساجين (بس انا مبتفرقش معايا حكاية اللبس دي) بلا لبس بلا مالبسش
المهم اخدنا الزي (كنا بنقول عليه انا وابن خالي بياده)
المهم
رحنا يوم السبت المذكور اعلاه
وعينك ما تشوف الا النور
بسم الله
صحينا الصبح
طبعا ابن خالي هو اللي كان بيفوت عليه لاني دايما نايم ما لم يصحيني احد
كان في بداية الايام امي بتصحيني ولما راحت المستشفي ابن خالي بيفوت عليه
المهم المهم
فات عليه
واخره كالعاده ... لاني في المواعيد ساعه والله ساعه بايظه طبعا
رحنا متأخرين قام العميد شاتمنا شتمتين وقلنا عقابا ليكم
لفوا حوالين الدايره دي لمدة ساعه
طب يا ابن الرخم ما فاضل ساعه يبقي احنا مش متأخرين .... عشان كده مش دي المواعيد اللي احترمها واروحها في ميعادها
كنا عند المكتبه المركزيه في الجامعه كده ... وعمالين نلف نلف نلف في البتاع اللي قدام المكتبه دي
انا طبعا ولا في دماغي
لما تعبت وانا ع الصبح ومفيش اكل ولا شرب ولسه اليوم طويل
اخد اللفه من هنا ولما اوصل في جزء من اللفه محدش يشوفني فيه
اقوم قاعد ومنفض
ولما احب اظهر في الصورة
اقوم واقف قدام الظباط دول والمناصب دي ورابط الجزمه
يقولي لف اقوله في سري (يا ابن) واعلي صوتي(الجزمه يا فندم بربطها) يقولي بسرعه
المهم
تمموا علينا
وركبنا الاتوبيس العسكري
وشدينا الرحال في تمام الثامنه متجهين الي بلبيس الشقيقه حيث مستقر الكليه الجويه
وتعالي ندخل جوه
عالم تاني ومستقل
مساحة الكليه قد مدينه كامله بسلطاتها ببابا غنوجها
واحنا داخلين عشان نوصل المكان اللي العرض هيتم فيه
والاهالي بقي واقفين بره عربيات من جميع المحافظات
وعشان احنا راكبين اتوبيس قوات مسلحه وسعوا لنا الطريق
عدينا علي اكتر من 10 اماكن اتفتشنا فيها تفتيش كلي
والوزير زي اي حد بيتفتش كليا
حتي واحد كان جمبي لابس بدله وداخل عند اخر باب فبيقول للراجل اللي بيفتشه
انا لوا (لواء يعني) قالوا اسف يا فندم دي تعليمات
وده ليه؟
لان سيادت الرئيس مبارك جاي بسلامته عشان يكرم اشباله
دخلنا وأخدنا مكانا في المدرجات
وممنوع دخول الموبايلات وكاميرات تصوير غير بتاعت التليفزيون
المهم
اخدنا اماكنا وكل واحد أخد دوسيه كده فيه الحاجت اللي هيتم تنفيذها في اليوم ده
والمواعيد هناك بالميللي
والعرض هيبدأ الساعه 12.05 بعد ما الريس يشرف في الساعه 12.00 ظهرا
الساعه دلوقت 11.50 نبص نلاقي صوت طياره
والدنيا وقفت
الريس راكب طياره خاصه بقي ومحدش قده
ابص الاقي هيصه وظغاريض وكلام كده
ابص الاقي الريس معدي من قدامي مفيش 3 متر بيني وبينه
والله التلت عقارب بتوع الساعه كانوا واقفين علي بعض الساعه 12.00 بالظبط
وانا قاعد منبهر وهو بيعمل ايده كده زي ما بيطلع في التليفزيون
ومش مصدق هو ده الريس
قمت مصفر باعلي صوتي وانا مش في حالتي
وحسيت احساس اول مره احسه
المهم
حصل موقف كده غريب ساعتها
الريس داخل في موكب 24 عربيه جيب والعربيه المرسيدس اللي هو راكب فيها
4 عربيات دخلوا قدامه والباقي حوطوه عشان هينزل
والحرس الجمهوري بقي ناس عامله زي الحيطه
اجسام خرسانيه
والناس كانت بتنط مــ العربيات عشان تحاوط الريس عشان معاليه ينزل يقعد مكانه
فالموقف بقي
كان واحد من الخنازير دي مستعجل اوي عشان ينزل يحوط الريس
قام نازل بضهره والعربيه ماشيه
قام واخد به وقعه علي ضهره
وقام وكأن شئ لم يكن ... والناس تضحك بقي
وتعالي يا عرض
عرض دقيق وقتيا وفعليا وكليا وجزئيا
الطلبه بقي داخلين يؤدوا العرض
في انتظام لم يسبق له مثيل
ويغنوا اغاني وطنيه ... يا نهار ... الواحد منبهر جدا جدا جدا من اللي بيحصل قدامه
ايه ده يا جدعان هو في كده في مصر
اه فيه
وتعالي بقي العرض الجوي بدأ
طيارات من احدث ما يكون والراجل بيحكي اللي هيحصل ونوع الطياره المستخدمه
ففففففففففففففففففففففففف
يا جدعان
والله مصر لسه بخير
الواحد في اليوم ده أخد جرعة امل تكفيه لمدة 3 سنين قدام
ومش هطول في اللي حصل هناك
ونروح الي لما خلصنا العرض في تمام الواحده ظهرا
والريس أخد طياره هوليكبتر وراح لمامي سوزي
واحنا بقي يلا نمشي
حاجه واحده استفدتها من اليوم ده بجانب جرعة الامل اللي أخدتها
الأمل ... التضحيه ... المجد
ده اللي مكتوب علي الدوسيه اللي انا لسه محتفظ بيه لغيت اللحظه دي
ده شعار الكليه الجويه
لازم يكون عندك أمل وتضحي من أجله هتوصل المجد فيه
ويلا نرجع
الجو ناااااااار ... والاتوبيس فيه ناس هتوقف لان العدد زياده
واحنا واقفين في صحرا
والناس بتتزاحم عــ اللي يقف قدام في الصف
عشان ينهض يقعد وميقفش
وانا حران وبكل برود اعصاب قمت سايب الزحمه وراجع واقف في اخر الصف وكل ما حد ييجي يقف ورايا اقف وراه
وسبحان الله
العميد شاف الناس بتتزاحم عــ اللي يقف قدام
قام ساحب الصف من ورا
اخر واحد يدخل الاتوبيس أول واحد
ههههههههههه
يا نهار ابيض العميد بيقولي أدخل انت اول واحد
سيبته وقعدت أضحك يقولي ايه ياد مالك اقوله ماليش
وقمت ساحب
الواد ابن خالي باعني ووقف قدام عشان ينهض كرسي
وانا نفضت
والقطار بيسحب بقي وانا اوله
ابص لاين خالي
يا ندل بتبعني
طب وحياة امك ما انا حاجز لك جمبي
وأضحك
المهم بقي ايه
ركبنا ومندلتش مع ابن خالي وحجزت له
وركبنا وابن خالي ده بؤ كبير فعمل حتة موقف كده مش مهم احكيه
واحنا طالعين
اتحديت نفسي في حاجه وكسبت التحدي واتضح لي اني جدع أوي وراجل جدا وبتحمل اي حاجه
مش مهم
المهم
وصلنا الجامعه
ونزلنا من مكان ما أتاخدنا
وقالوا لنا تيجوا تمتحنوا بكره وتسلموا الهدوم دي بكره
قلنا ماشي
وركبت وروحت انا وابن خالي
رجعت لاقيت تجمع اسري وكل افراد الاسره والاعمام
ودخلت سلام عليكو ردوا السلام
كنت فين يا محمد كنت بره
بس خلصت
ملحوظه انا ممكن اقعد شهر بره البيت ومحدش يقولي كنت فين ولا عملت ايه
قمت منفض ليهم
ويقولوا تعالي اقعد معانا ... قلت لهم هغير واجي
دخلت غيرت ... ونمت ونفضت ليهم
وصحيت بالليل
كلي أمل وسعاده بالغه
صحيت قلت هكتب موضوع ع البلوج عن اللي حصل النهارده بس نفضت
واديني كتبته
واخواتي كانوا عند امي بالليل في المستشفي وجم وهنروح بكره نمتحن ونسلم الهدوم ونفوت علي امي
ونمنا واين خالي فات عليه عشان ننفذ المذكور اعلاه
ويلا نشوف بكره
هيحصل ايه؟؟؟؟؟
؟؟؟؟؟؟؟؟؟؟؟
يتبع
انتظروني