Mid Term Exams

طبعا لاني داخل الكليه دي ومش عاوز منها تقدير أكتر من جيد
فبالتالي الامتحانات مبتفرقش معايا قد كده
عشان كده الميد تيرم ملوش اي اعتبار عندي
رغم انه الدرجه بتفرق معايا
لان معظم المواد بيبقي فرق درجه واحده والتقدير يتغير
بس ولا الهوا
احنا مبناكلش من الكلام ده
بس الميد تيرم ده مفيد جدا بالنسبه لي
لاني ببتدي اغرف المواد بتقول ايه
ونظام الامتحان فيها بيبقي ازاي
ونركز علي ايه وكل الكلام الكتير ده
ندخل في الموضوع
ابتدأ الميد تيرم بماده
SoftWar Engineer
قاعد انا قبلها بيوم لغيت الساعه 3 ص اذاكر ماده تانيه خالص
مسيبتهاش غير لما خلصتها ومنفش للماده بتاعت بكره خالص
المهم نمنا وصحينا بدري ع الساعه 10 كده
وانا لا ادري عما تدور الماده
قمت مطلع 5 اسئله وحفظتهم جه منهم 3 في الامتحان
وحلينا الصح وغلط اي كلام كده
انا بقي قاعد منفض للدنيا كلها وعمال اضحك
والبشمهندسه مروة كل شويه تبص لي وتقولي اموت واعرف بتضحك علي ايه
اقولها يا بشمهندسه اصل في كلام اول مرة اشوفه في حياتي
المهم انا ضارب بالانس ورا ومنفض للعالم قاعد بضحك
البشمهندسه شكت اني قاعد ورا لوحدي وابص لها واضحك
قامت رجعه ليا قالت شكلك معاك مذكرات وشغال
قلتها ولو معايا والله ما هعرف اطلع منها اجابات
بهزار
وانا متضايق موت لانها قالت كده وشكت فيه
قمت مشتغلها بقي
انتي هتتنططي لي طب وربنا لاعلمك الادب
مثلت اللي انا بغش مليون الميه ابص في الارض وابص لها وبعدين ابص للسقف واروح كاتب
البشمهندسه اتاكدت ان انا بغش قامت قاعده تلف وتدور يمين وشمال ولا عارفه تقول ايه
اخر ما زهقت قامت جايه قاعده جمبي قالت والله يا ابني شكلك معاك حاجه بتنقل منها
قلت لها انتي مش قاعده طيب شوفي واحكمي
قمت قافل القلم وقاعد
قالت ما تحل
قلت لها منين بقي ما انتي جيتي هحل ازاي
قامت ضاحكه لانها ملقيتش معايا حاجه
قمت قايل لها والله يا بشمهندسه ما في حاجه وهو انا هخسر شرفي عشان 15 قرش والحدق يضحك
قامت قايله انا هنا مش عشانك اصل في ناس قدام بتغش وانا عاوزة امسكهم متلبسين
قمت فاتح القلم ومكمل تأليف
وانتهت الماده علي خير


نروح للماده التانيه
ااااااااااااه منها ال
Assembly
مذاكر الكتاب كله مش سايب فيه سطر واحد غير هي جزئيه واحده بس
يقوم الدكتور جايبها اول مسأله
قلت له يا ابن التيت
نفضت لها وكملت الامتحان ومخلص وماشي
ما هي توفيق من ربنا بقه اللهم لا اعتراض

نروح للماده التالته
Micro Processor
دكتور علي قده والله
اقل ماده ذاكرتها واكتر ماده حليت فيها
هي ساعة صبحيه طلعت الحاجات اللي بيركز عليها وذاكرتهم كويس ورحت حليتهم ورجعت
هي ساعه الا ربع مفيش غيرها
ابراهيم يقولي يا ابني اقعد كمل
اقوله يا عم الورقه خلصت
قالي بقي هي دي مشكلتك خد ورقه تانيه
اقوله بقي يا بشمهندس قاعد بحشي في الورقه عشان تخلص تقوم انت مديني ورقه تانيه
متجيش غير منك انت يا بشمهندس
قال انت هتشتغلني يا عم غور قلت له بشمهندس والله حليت كويس
قالي طب مع السلامه ونصيحتين كده من ابراهيم المعروفين

ننقل ع الماده الغريبه جدا
A I الذكاء الاصطناعي
هههههههههه
وربنا حظوظ
المحاضره الوحيده اللي محضرتهاش
والفصل اللي مذكرتهوش
قاعد بذاكر في الاولاني والتاني لغيت ما الوقت خلص
اروح الاقي سؤال واحد مش مذاكر فصله
ولا يهمك يا ابوصلاح ألف هي اول مره
كنت حضرت محاضره شرح فيها اخر الفصل وكنت فاهم
حمعت وكتبت اللي انا فاكره
يعني هسيب له الورقه فاضيه
وخصوصا ان دي الماده الوحيد اللي رحتها في ميعادها
نسيت اقو ان انا ملتزم بالمواعيد جدا الامتحان 12.30 اكون هناك 12.45 مفيهاش هزار
انتظام انتظام
اروح الماده بدري واسيب الورقه فاضيه
خصوصا انه في واحده رزله جدا وانا داخل
طبعا منتظم ورايح اقعد ورا في مكاني
الاقيها بتقولي لاء تعالي اقعد هنا
اقولها يا ستي مكاني ورا تقولي يا تقعد هنا يا تجيب الورقه وتمشي
قلت لها انا ايه اللي جابني بدري بس
يلا يا تيت قمت داخل وقاعد في المكان اللي قالت لي عليه
وهو ده سبب الازمه واني محلتش السؤال المذكور اعلاه
المهم خلصت علي خير

نروح للماده الاخيره بتاعت النهارده
NetWork2
طبعا الماده دي هي اللي قفلتها يوم ماده هندسه البرمجيات
فمذاكرتهاش خالص
ما انا زهقت م المذاكره بقالي تلت اربع تيام بذاكر ذاكرت لي بتاع 15 ساعه في اسبوع
الواحد دماغه اتأكسدت خلاص
المهم راجعت الصبحيه بدري كده من الساعه 10 لغيت ما مشيت
روحت في ميعادي المعتاد طبعا
وافتكرت اللي حصل لي امبارح قمت واخدها جري لغيت ورا عشان محدش يكلمني
ونسيت اخد ورقه
قمت راجع واخد لي ورقه واللي يتكلم اقوله كتبي ورا
المهم ضربت بالانس في الطراوه ورا تحت احد المراوح وفي الهدوء ورا
بنحل
طبعا في حاجات عاوزة اله حاسبه
مش فاضيين نحسب بقي
قمت مطلع الموبايل ابراهيم شافني قالي بتعمل ايه في الموبايل قلت له اله حاسبه
ومجرد انه شك اشتغلته هو كمان
هو حبيبي اه بس اشتغلته ومريحتهوش غير لما رجعلي ورا يشوف انا ورا بعمل ايه وبعمل ايه في الموبايل
المهم رجع ورا انت يا واد بطل غش بقي ومتتكلمش مع اللي جمبك
بيهزر طبعا
لانه مفيش حد جمبي
قمت قايل له معلش يا بشهندس اصل في سؤال مش عارفه هشوفه من اللي جمبي وامشي
قام ضاحك وسايبني وماشي
حلينا الحمد لله كويس
مش اوي بس حلينا علي قد مذاكرتنا بل واكثر
ربنا يخليهملي اللي بيدعولي في سرهم
عارفين نفسهم طبعا


وانتهت الامتحانات علي كده
وفي انتظار الفاينال ربنا يعديها علي خير

اسيبكم انا بقي عشان اخت الواد صحبي هتتخطف قصدي هتتخطب النهارده يا دوب انهض اغير وانزله
يالا الف مبروك يا عم صبحي وعقبال عيالك

يلا سلام


ملحوظه
انتظروا الموضوع اللي جاي
جامد جدا جدا
هخلصه واوعدكم هيعجبكم
بس اعملو حسابكم في ساعه من عمركم ... مش خساره فيه طبعا
س ل ا م ي