اه والله عوام
ويعدي المانش برجل واحده كمان هو الكلام بفلوس
طب والله الامثال العربيه دي ملهاش حل
كلها جامده وفيري فيري واقعيه
يعني اخر مثل سمعته كان بيقولك ايه
بعد امي واختي ... الكل جيران
وما ابلغه عن الموقف اللي انضربلي فيه
سبق وقلنا الفرق بين الامثال العربيه والغربيه
وقلنا
ان الامثال الغربيه ما هيا الا اقوال حكماء وفلاسفه
يعني فيها شوية خيال وفلسفه ملهاش محل من الاعراب الواقعي
انما الامثال العربيه
يا سلام ... اي نعم كلام لوكال بس في الجون وواقعي اخر تلت اربع حاجات
تحس ان ابو الليف بيغني قدامك
ههههه
ال ابوالليف ال
والله قمة الانحدار الثقافي انك تلاقي واحد زي ده واخد المكانه والشهره دي
اقول ايه بس
الانحدار مش عنده هو ... هو عندنا احنا
لانه اتشهر علي قفانا
المهم نرجع للمثل بتاع عنوانا
بينما نحن في المصيف هذا العام
وانا بغسل الاقيلك شوية شباب جايبين واحد كان غرقان وبيفوقوه
وطبعا انا بقيت اجتماعي اكتر من اللازم وبقيت رغاي وابن دزمه
الواد تحس انه فايق بس هو في غيبوبه اساسا
ومفتح بس مش عايش معانا خالص
اي نعم مسيبتوش غير لما فاق ونطق اسمه
ربنا يسامحه تسبب في توهانا عن الجروب اللي كنا فيه ولفينا ساعه في عز الحر وحافيين كمان
بس يلا البحر كان قريب مننا ورمينا فيه الخير كالعاده يعني
المهم
الواد واحنا بنفوقه
كل ما الميه تيجي عليه ... يقعد يهوش بايديه كده وكده ويمين وشمال
ال يعني الواد بيعوم
ماهو لسه مفقش ومخه معيشه علي اخر حاجه فاكرها انه بيغرق
فبيحاول يقاوم الميه اللي بتيجي عليه ويقعد يلوش بايديه يمين وشمال
طب يا حبيبي ما انت كنت في الميه ... معملتش كده ليه يعني؟
ولا هو اللي علي البر عوام يعني
ولما ييجي في البحر يسقط قناعه
كده الموقف خلص
وافتكرت ساعتها المثل بتاعنا ده
تيجي انت تحكي لاي حد اي حاجه وتاخد رأيه
تلاقيه في الكلام مفيش بعد كده وكلامه بصراحه لاء الواد ده عوام عوام
بس لما ترميه في البحر وتحطه في الموقف فعليا
تلاقيه غرق في شبر ميه
كثر الكلام واصبح مجرد كلام غير قابل للتطبيق علي ارض الواقع
عشان كده
متاخدش برأي حد غير لما يكون مر بيه قبل كده وفعلا اتصرف كده وتصرفه نجح واقعيا
انما هتاخد رأي واحد كل كلامه مجرد اعتقادات يراها تصح ان تطبق واقعيا
ده كده تبقي قوله اللي علي البر عوام
اعتقد انك ممكن تعمل كذا كذا او انا شايف انك مفروض تعمل كذا كذا
لا يا عم انت فاكرني فار تجارب
وهتعتقد عليه
صلي علي النبي في سرك كده ولو كنت مريت بموقف مشابه قول اللي عندك
وكلامك لو مجرد كلام خليه في سرك ... متقرفش الناس علي الفاضي
علي فكره في حاجات كتير
مش مستاهله التفكير والاجابه علي سؤال يبدأ بلماذا
هي كده
ده اللي حصل
لانك مهما فكرت ودبرت واحسنت الترتيب
سنبقي مجرد ممثلين في مسرحيه كاتبها القدر
اذا فلنعقدها ونتوكل علي مسبب القدر
بس
ليست هناك تعليقات:
إرسال تعليق