ماذا يمثل الشارع لمحمد صلاح

السلام عليكم
طبعا محدش هيرد زي كل مره
يمكن انا بحب البلوج ده اوي اوي
اسبب واحد بس
ان الناس مش بترد مش عارف ليه؟
ده بيشجعني علي الكتابه اكتر لاني حاسس اني بكتب لنفسي بس
مش موضوعنا
نرجع لموضوع الشارع
وبيمثل لي ايه بالظبط
الشــــــــــــــــــــــارع
كلمه كده مش عارف معناها
بس المهم ان الشارع ده حاجه بالنسبه لي
متراوحه من فتره لاخري
يعني مثلا وانا صغير اوي
بتاع تلت اربع سنين كده
كنت مش بنزل الشارع غير وانا ماسك في جلبية امي
مكان ما امي تروح كنت معاها
دايما معاها والمره اللي تمشي فيها من غيري
كنت اقعد اعيط لغيت ما تيجي
ومكنتش اعرف اي حاجه خالص بره البيت
ولا جوه البيت
المهم كبرنا شويه وبقينا خمس سنين لغيت ما دخلنا المدرسه
كنت بشوف العالم ده كله في وسعايه كده بتاع 100*100 متر
مش كنت بشوف اكتر من كده
كنت دارس المنطقه دي كويس جدا
وكنت لما اخرج بره النطاق ده احس اني خارج مملكتي
تايه وبتمني اني ارجع لمملكتي تاني
دخلنا المدرسه وكبرنا شويه
وعرفنا اماكن اكتر ووسعنا المملكه دي شويه
وبقيت دايس في البلد كلها
اعرفها كاملة...وبحبها جدا علي فكره
ولي الفخر حتي الان اني من تلك المنطقه وذاك المكان
بس بردوا كان في اماكن مش اعرفها
ومكنتش اتأخر بره البيت لغيت الساعه سبعه بالليل كده
جينا كبرنا شويه وبقينا في المرحله الابتدائيه
كنت دايس بقي في اماكن في البلد بس بردوا في اماكن مكنتش لسه زرتها
المهم كنت بحب انزل الشارع والعب قدام البيت وكنت بحب كده اوي
علي الرغم من ان جدي الله يرحمه كان دايما يشتم فينا عشان بنطلع صوت وكده وبتاع
ومرت السنون
وبقينا في الاعداديه
كنت بحب الشارع الي حد ما بس مكنتش بنزله غير في الاجازات
وكنت بنام قدام البيت هربا من الحر
وجينا كبرنا اكتر
ودخلنا ثانوي
والمردسه كانت في بلد جمبنا تبعد عنا ببتاع عشره كيلو كده
كنا بناخدها بالعجله
ويا خوضنا مغامران بالعجل انا وعلي الجوهري ومحمد الجوهري ووليد وعلي الجن
يااااااااااااه
وياما نزلنا ولعبنا مع ناس منعرفهمش
المهم
كنت بحب الشارع وانا في اولي التيرم الاول من اولي ثانوي
جيت لاقيت نفسي جايب 96 والناس بدأت تعايرني
قمت غايب عن الشارع التيرم الثاني
لاقيت نفسي جايب 250 قلت يبقي العيب في الشارع
وغيبنا علي الشارع من اللحظه اللي فاتت دي لغيت اخر الثانويه
علي الرغم من ان في الاجازات
كنت فيه علي طول انا وباسم اخويه او اكتر وابن خالتي
المهم بعد الغياب وخنقة الثانويه
دخلنا الكليه
وبقينا من اولاد الشوارع في سنه اولي
كنت بعشق الشارع ومبروحش غير ع النوم الساعه 3 كده
وياما انطردنا وانضربنا واتخانقنا
المهم كان في صراع نفسي زائد شله كنت من هواة الشوارع
كنا دايما في الشارع
المهم اخدنا علي الشارع في اولي كليه وبقيت مقدرش اغيب عنه اكتر من فترة النوم
ومنفعش وعمل مشاكل
المهم دخلنا علي تانيه وربنا هدانا
وبدأنا نخف رجلينا شويه
وبصعوبه وتحت ظروف معينه قدرت اشيل رجلي من الشارع كله
واكتفيت بالمملكه الصغيره اللي قلتها في الاول
بالمناسبه انا بحب امشي في الشارع حافي
بحس بمتعه جامده اوي ليها طعم خاص كده
حتي كنا بنصلي الجمعه في مكان معين ونرجع
قالعين الشباشب وواخدينها زق قدامنا
المهم
زادت الظروف حده ووصلت لذروتها الفتره اللي فاتت دي
امي ماتت واخويا كان بييجي يومين في الاسبوع وكمان دلوقت في الجيش بييجي كل فتره
المهم بقيت مطالب اني مخرجش من البيت عشان اخواتي وكده وبتاع
اتبعت التعليمات
ودلوقت مبقتش انزل الشارع خالص
بكتفي بذكرياتي معاه وقد ايه كان بيلمنا لما كنا بننطرد من البيت
هههههههه
دلوقت بقي لما وليد يمسد عليه وانزله ونخبط لفتين في البلد
نلاقي حاجات غريبه وتجديدات محضرتش افتتاحها علي عادتي
بس يلا حصل خير
دلوقت بقي لما بمشي في الشارع
بقيت اخاف وبستغربه موت
ونادرا يعني لما انزله
يعني اوصل اخواتي المتجوزين
وساعتها تبقي اتكتبت عليه تاخيره
كل الناس بتمسك فيه عشان اقعد معاهم بسبب الغيبه
لاني مبخرجش من البيت مهما كان غير ع الكليه وبس
ولما اشتاق للشارع ادخل انام واصحي بالليل عشان الشارع يكون نايم
علي فكره انا من الناس المشهوره والمحبوبه جدا والفضل لله
اللهم حبب فينا خلقت
وجايز اللي دفعني لكتابة الموضوع ده
وانا بصلي الفجر النهارده
دخلت الجامع استغربته وقلت انا فين
حتي المدرسه الابتادئيه حصل فيها تجديدات
والمشكله ان الجامع والبيت جمب البيت يعني مش بعيد
ورجعت من الصلا جلست علي الاطلال وذكريات الشارع
علي فكره
بلدنا بتاع 600 فدان او اكتر
مفيش شبر فيها مليش ذكرياااااااات فيه
اعذرني بل اعذر ظروفي ايها الشارع
انا مملكتي دلوقت لا تتعدي حدود الاوضه اللي قاعد فيها دلوقت
حتي لما يكون البيت فاضي محبش اخرج من الاوضه
غير عشان اكلم محمد صلاح عشان لو قرا الموضوع ميقولش انه دايما بيكلمني من الشارع
هي البلكون بس اللي لازقه في الشارع
س ل ا م ي