عفوا ... مثال واحد لا يكفي

طول ماحنا عايشين في الدنيا دي ... بنتعلم
لكل قاعده شواذ ... ومينفعش ناخد كل حاله شاذه علي انها قاعده مستقله بذاتها ... بل وبنطبقها علي حاجات تانيه علي اساس انها قاعده علي الرغم من انها حاله شاذه من قاعده
يعني مينفعش نخلي الحاله الشاذه قاعده ونطبقها
ربنا خلق الكون ده والــDefault بتاع كل حاجه فيه انها حاجه حلوه
وربنا بردوا خلق الانسان والــDefault بتاعه انه يكون مسلم
ولما اقول مسلم يبقي نتخيلي كل حاجه حلوة يجب ان يتحلي بها المسلم
وعلي الرغم من كثرة الحالات الشاذه ... بس مهما كتروا مينفعش نخليهم قاعده
وننسي القواعد الاساسيه (الامانه ... الحب ... الخير)
دي مقدمه بسيطه وغير مفهومه -اكيد- بس اللي هياخد الكلام علي صدره ( ويطلعه من مناخيره ) ممكن يعرف انا عاوز اوصل لايه؟
ندخل فـــ الموضوع؟ ... ندخل:
الناس الكبيره دي حاجه غريبه جدا...فاكرين نفسهم عارفين كل حاجه...من شوية تجارب مرت عليهم فـــ حياتهم يبقوا احاطوا بكل شئ علما
وده مش صح بالدرجه الكافيه (يعني منقدرش نقول عليه صح)
لان كل تجربه بنمر بيها فــ حياتنا ليها مكان وزمان وناس ومناخ بيختلف من حين لاخر
ممكن عالم يعمل تجربه فــ الصيف .... وتفشل ... يقوم قايلك ان المعادله دي غلط
ممكن تكون غلط فعلا
بس بردوا ممكن يكون الحر اللي في الزمن ده بين قوسين الصيف هو سبب فشل التجربه
جرب ياخي تعملها في مناخ غير اللي جربتها فيه....... مـــ حــ د ش فــ ا هــ مــ حــ ا جــ هــ
... هتلاقيهم بيقولو لك أن الزيت عمره ما بيختلط بالماء
ميعرفوش انه ممكن يختلط فعلا ... بس لو حطينا عليهم صابون
لان الصابون بيخلي الزيت يختلط بالميه
تيجي تقولهم كده ... يقولو لك هو عشان انت اتعلمتلي كلمتين هتتنطط بيهم عليه
يا عم ابوس ايدك طب جرب انت زعلان ليه؟
يقولو لك يا سيدي جربت ولاقيت مينفعش
يا سيدي الله يهديك ... الطب كل يوم بيتقدم جرب بس
ولما تجرب قدامه والتجربه تنجح ... مش هيقتنع بردوا وهيقنع نفسه ان هو الصح
طب ولو مجربتش قدامه بقـــــــــــــــــــــي
........ م ش ع ا ر ف ب ص ر ا ح ه
تيجي تقول لهم الناس كلهم كويسين الا ان يثبتوا العكس ... دا ده اللي ربنا فطر عليه البشر
ومن كتر ما هما جربوا واتعاملوا مع ناس يقولوا لك لاء
الناس كلهم وحشين الا ان يثبتوا العكس
اخدوا الشواذ علي انهم القاعده ونسيوا القاعده نفسها
يا عم اللي يرضي عنك ... انت مهما اتعاملت مع ناس كتير فأنت متعاملتش معاهم كلهم عشان تاخد شواذهم قاعده وتطبقها في غير مكانها
حاجه فـــ منتهي الغرابه
صحيح ان زمانا ده ميعلمش بيه الا ربنا ... وكتر الحالات الشاذه فيه واللي بقت بمثابة قاعده ... بس مش معني كده اني اطبقها
وامشي بقي اخون اي واحد الا ان يثبت لي ان هو امين ... هو مش مضطر لكده اساسا
عشان كده بقول
مثال واحد لا يكفي
وحاجه اخيره احب اقولها
ان اللي بيدور علي حاجه بيلاقيها
اللي بيدور عــ الحب هيلاقيه واللي بيدور عــ الكره بردوا بيلاقيه
اللي بيدور عــ الخير هيلاقيه واللي بيدور عــ الشر بردوا بيلاقيه
صفي نفسك من جوة وكله هيكون تمام
وشوف انت عاوز ايه وهتلاقيه ... ولو مش لاقيت اللي انت عاوزة او وقعت في منطقه مش بتاعتك يبقي العيب فيك
لانك كنت بتدور فعلا عــ المنطقه الغلط اللي وقعت فيها
والدليل انك لما لاقيتها
.
.
.
وقعت فيها

س ل ا م ي