صلاح والماظه

الماظه دي مش أم أحمد يعني ولا حاجه
الماظه داغر هو الاسم الحقيقي للفنانه اسيـــــــــا داغر
محدش عارف هيا اتولدت في سنه كام بالظبط
1904 ولا 1908 ولا 1912 والارجح هو الاخير
يبقي نقول ولدت 1912 في قرية تنورين في لبنان وتوفيت 1986
اسيـــــــــا داغر هي مالكة شركة اسيـــــــــا للانتاج السينمائي

نروح بقي لفيلمنا المقدم من اسيـــــــــا سنـــ1963ـــة
اللي كان اضخم انتاج في تاريخ السينما المصريه
واللي اتكلف انتاجه حوالي 200.000 جنيه
وده مكنش مبلغ صغير اياميها
انت بتتكلم في حوالي مليون دولار
والفيلم ده هو
الناصر صلاح الدين
الاخت اسيا ضحت بكتير اوي عشان تنتج الفيلم ده
رهنت عمارتها الوحيده واتعرضت للحجز علي اثاث بيتها واثاث شركتها وعربيتها كمان
ضحت بكل حاجه عشان تطلع فيلم رفيع المستوي
الفيلم الذي تفوق علي الفيلم الامريكي ريتشارد قلب الاسد
اللي انتج في اعوام مقاربه لفيلم الناصر صلاح الدين
بس فيلمنا تفوق عليه من حيث الانتاج وصحة الاحداث التاريخيه المقدمه فيه
لدرجة انه دخل الاوسكار
ههههه
ولما تيجي سيرة الاوسكار لاي فيلم عربي يبقي لازم تقف وتضحك
لان اوسكار مديتناش حاجه عشان الاخ احمد مظهر كان لابس ساعه في الفيلم
ال يعني صلاح الدين كان لابس ساعه وهو بيحارب
بنبوظ الطبخه علي قرش ملح
مش موضوعنا اساسا
الفيلم ده نجح فنيا وجماهيريا نجاح منقطع النظير
بس لم يحقق اي مكاسب ماديه
وكان سبب رئيسي في افلاس شركة اسيـــــــــا
والحجز علي كل مدخرات الاخت اسيا داغر
وقالت اسيــــا داغر معلله سبب فشل الفيلم ماديا
بعد الانتهاء من الفيلم طلبت مني "الهيئة المحترمة" أي هيئة السينما، الاحتفاظ بنسخ الفيلم عندها للقيام بتوزيعه وتسويقه، وبالطبع لم يُسوَّق الفيلم جيداً ولم يوزع وفقاً لخطَّة مدروسة، والنتيجة إنهم لم يعطوني حتى الإيرادات

ومن الجدير بالذكر ان اسيا كانت محتفظه بكل اكسسوارات الفيلم والفرسان في مكتبها وفي بيتها حتي وفاتها

بس الست كانت جدعه بصراحه وقدرت ترجع تاني للانتاج
معرفش ازاي
ده كله مش موضوعنا اساسا
نروح بقي لفيلم الناصر صلاح الدين

النــــــــاصر صلاح الدين

انا سمعت الفيلم ده ايام الامتحانات اللي فاتت دي
فيلم مبالغ فيه
ومطلعلك ان صلاح الدين ده مفيش قبله ولا بعده
يا خراشي ملاك علي الارض يا ولاه
ده ايه المبالغه دي
وكعادة التاريخ هيا يعني عادته ولا هيشتريها
غالبا ما يكذب ودائما ما يتجمل
و مبيلعبش غير علي الشخصيه الرئيسيه ويهمل اي حاجه بعد كده
مش صح طبعا
هو صلاح الدين عمل ايه يعني؟؟؟
ما احنا عندنا صلاح في البيت كان عمل ايه؟
بهزر طبعا
الحاج صلاح ده هو الخير والبركه

لا وتلاقي الاغاني تقولك صلاح الدين
وكلنا صلاح الدين وكلام كتير من هذا القبيل

انا لا اقلل من قدر صلاح الدين
ده راجل من الرجال اللي غيروا مسار التاريخ
يعني لما تيجي سيرته
ينطبع في ذهنك ان التاريخ كان هيمشي في اتجاه معين وهو غير الاتجاه ده
علي عيني وعلي راسي
صلاح الدين ماهو الا حاكم حكيم عادل

بس صلاح الدين لو كان لوحده اياميها
مكنش عرف يروح ولا ييجي
كان حواليه كل حاجه تقوده للنصر
يكفيه اسمه
وعشان هو حكيم قدر يسخر كل حاجه صح عشان ينجح
واكيد هو كان متأكد ان النصر مبيجيش فرداني كده
لاء دا احنا لو مكناش ايد واحده ولا عمرنا كنا هنتقدم خطوه واحده
الاتحاد قوه ولا ايه يا ريس منك ليه

صلاح الدين راجل انا بحبه وبقدره جدا
وبحترم فيه قوته المقنعه بقناع التواضع
بس اكيد لوحده مكنش عمل حاجه

يعني بلاش نقول اين صلاح الدين المنتظر ومش عارف ايه؟؟
احنا مش عاوزين صلاح الدين بس
احنا عاوزين

عز الدين
و
جمال الدين
و
كمال الدين
و
علاء الدين
و
نصر الدين
و
فخر الدين
و
جلال الدين
و
حب الدين

احنا مش عاوزين صلاح الدين الاسم
احنا عاوزين صلاح الدين المعني

بس
خلص الكلام