So, I've to Relax and Enjoy

مش في حد ينبهمي ان السيكستين دايز خلصوا من يومين تلاته
هنكتب كتير النهارده؟؟؟
مش عارف اهو هنسيبها وزي ما تيجي
حاكم انا واخد حكم شهر سجن مع النفاذ
ومن ساعة ما خلصنا وانا محبوس في الاوضه
بنقضي فترة العقوبه
لا بكلم حد ولا حد عارف يكلمني
ماهو القلم ده متفوقش منه غير لما تشوف نتيجته

العالم كله شاف فيلم تيتانيك الا رياض المنفلوطي طبعا
يمكن اجمد حته عجبتني في الفيلم ده
لما مالك السفينه قالهم افتحوا السرعات عاوزين نوصل في فتره قياسيه
عاوزين نبهر العالم ونتصدر عناوين صحف نيويورك
وجه في اخر الفيلم ... لما سفينة الاحلام غرقت
القبطان قاله جمله جااااااامده اخر شوية حاجات
قاله : افرح يا ابن المحظوظه اديك هتتصدر عناوين صحف العالم كله

مش كده
كنت عاوزه يبقي يوم تاريخي يابو صلاح
طب قابل يا سيدي
يوم تاريخي وصدقني مش هتنساه
كان باين من ساعة ما صحيت من النوم
لغيت لما اتسحبت مني ورقة الاجابه من قبل حتي ما اكتب عليها اسمي

وبعد الامتحان
.
.
.
مش عارف
كنت عاوز اعملي بتاع 15 حاجه كده
معملتش منهم غير حاجتين بس
ولكن
الخيره فيما اختاره الله
واللهم لا اعتراض
واكيد زي ما قلت قبل ما اسلم ورقتي
مهما يكون ... يا رب لك الحمد كما ينبغي لجلال وجهك وعظيم سلطانك
ومعملتش اول حاجه اللي المفروض كنت اعملها قبل ما اسلم الورقه

مش مهم
تحبوا اكلمكوا شويه عن احمد رأفت؟؟؟
عن ازاي اتعين وكده يعني
لسه عارفها النهارده بس
واتضح ان دكتور وليد خضر برقبته ورقبة اللي جايبينه
والتاريخ يشهد علي كده
غيرش هيا بتيجي مع الهبل دوبل
وهكتفي باني اقولكم ان ايامه كان التعيين علي تقدير اخر سنه بس
واكيد كونه مكنش مميز في السنين اللي قبل دي
اكيد حاسس بالنقص

ماهو لما يبقي حتة امين شرطه
تافه وحقير وميسواش في سوق الرجاله 35 قرش ... حق اجرة سرفيس رايح بس
ييجي يتحكم في منطقه بحالها ويستغل سلطته اللي هيا مش سلطه اساسا
وهو قدام وكيل النيابه بيبقي زي النمله قدام الفيل
في تحقيق مصالح شخصيه معينه
ده لمو اخزي مش عيب فيه -ان طلع العيب من اهل العيب ميبقاش عيب-
ده عيب في البقر اللي قعدوه في المكان ده
ونايمين وبيشخروا في بيوتهم وسايبينه يخرب بيوت الناس
ده عيب فيهم والله
هو ناقص اساسا وشبع بعد جوع
يعني هتعيبه ازاي يعني

عيب علي واحد محترم يستغل سلطته لتحقيق مصالحه الشخصيه
مش عشان انا شديت معاك يبقي تسحب مني الورقه
يا حبي انت تحمد ربنا اني منسيتش نفسي وانا بكلمك
اي نعم خرفت شويه بس متستحقش بردوا
انت داخل تراقب ... ملكش تسحب ورقه غير لما تلاقيني بغش
وبكده لو انت ولا الف زيك هتعرفوا تاخدوا مني ورقه
هو بقي ايه؟؟؟
افتكرني هتحايل عليه والنبي يا دكتور والذذ معاه وكده وبتاع
انت دخلت كرامتك في النص واستغليت سلطتك
طب والله لامرمطهالك اكتر
هو اللي رجعها لوحدوا في الاخر
وركب الهوا ... زي ما انا عاوز بالظبط

بس مش الكلام علي ده
الكلام علي الستاتس دي
مكتوبه بتاريخ قديم علي فكره
من حوالي شهر
وفي شهود هيشهدوا علي كده
والله انا عارف انه مريض من زمان وعنده نقص وبيحاول يعوضه فينا
مش عارف اقولك ايه والله؟؟؟
بس انا اسف اني مسكت نفسي عنك اكتر من مره
وربنا يسامح اللي كانوا بياخدوني علي قد عقلي

بس
مفيش مشكلة ولو في مشكلة حلها مش مشكلة لإن المشكلة مفيش مشكلة يبقى فين المشكلة مفيش مشكلة
والدكتور قال
الناس وهيا بتحل المشكله
يا اما يتجاهلو المشكله وينكروها وده غلط
يا اما يدو المشكله اكبر من حقها وده بردوا غلط
يا اما يدو المشكله اقل من حقها وده غلط بردوا
بس مقالش ايه الصح
ودلوقت بقت المشكله انك تحدد حجم المشكله يعني سيبنا المشكله وبقت المشكله حجم المشكله مش المشكله نفسها
توهتكوا انا اكتر من محمد صبحي ... صح؟
نسيبها علي الله وزي ما تيجي
اكيد مش هنعرف نمشي عادي
بس نحاول ... ولرب ضاره نافعه
وكل تأخيره وفيها خيره