الفكر الصحيح

طبعا انا بقيت بحب التاريخ جدا الفتره اللي فاتت جدا الفتره الاخيره
الواحد مش عارف كان عايش ازاي من غير ما يبقي عارف الدنيا دي كانت ماشيه ازاي
انا طول عمري اساسا كنت احب التاريخ
بس كنت بكره اسلوب التحفيظ بتاع المدارس فكان عندي مشكله وعقده فيه
بس مكرهتهوش
بجد الواحد لما دخل علم قصدي ادب التاريخ من طريق غير المذكور اعلاه
أدمنه بمعني الكلمه لدرجة ان الواحد فكر يعمل دبلومه في التاريخ اثناء الجيش
لان التاريخ فعلا بيعيد نفسه مع اختلاف الزمان والمكان والاشخاص
بس بتبقي نفس الفكره
من خلال صولاتي وجولاتي في التاريخ عرفت ان مصر داخله مرحله محدش واخد باله منها
هتكون القاهره اشبه بكثر الي
إسطنبول عاصمة الدوله العثمانيه الاسلاميه وانكره عاصمة الدوله التركيه العلمانيه
نروح لموضوعنا
بلا مصر بلا كلام فارغ
هروح للفتره ما بين 132:138 هــ اللي هيا والتي تشبه كثرا الاحداث اللي احنا فيها دلوقت
من ثورات في كل مكان
ناس مبتحبش ناس
وانقلابات في الحكم ودول بتقوم ودول بتموت
ولا ننسي الفتايين ايضا
العباسيين عملو مجازر للامويين ومفيش حد من العائله الامويه مكنش مطلوب الرأس
دول شمال افريقيا كانت منفصله عن الدوله الامويه وعمالين يفرقوا بين العرب والبربر
الاندلس كانت مستبعده تماما عن فكر المسلمين في الفتره دي
وكانت فريسه سهله للنصاري وخصوصا ان الاندلس كانت حريقة ثورات في الفتره دي
لدرجة ان المؤرخين قالوا كاد الاسلام ان ينتهي في بلاد الاندلس عام 138هــ
لو هتكلم عن الشخصيه اللي ابهرت العالم واللي محدش ظهر بعده في نفس قوته وعقله
عبدالرحمن بن معاويه بن الوليد بن عبدالملك
قصته تستحق مسلسل منذ ولادته وكيف نجا من العباسيين والي اين اتجه وكيف فكر وهو مازال أمردا
تحفه بجد
تفكيره وعبقريته في الفتره من 123:138 هــ واللي كان عمره فيها من 19:25 سنه
معتقدش ان التاريخ فيه واحد في السن ده كما عبدالرحمن بن معاويه
بعد رحله استمرت 6سنوات وهروبه من العراق"نهر الفرات"مرورا بالحجاز و مصر والقيروان رجوعا الي ليبيا ثم استقراره في الاندلس
وبعد فكر يحسد عليه جمع اليمنيون ومعظم الامويين اللي كانوا متفرقين في كل الدول الاسلاميه
ذهب عبدالرحمن بن معاويه الي يوسف بن عبدالرحمن الفهري
وراسله انه من امراء الامويين ويريد ان يوليه علي احدي الامارات الاندلسيه ليساعده في قمع الثورات والجهاد ضد النصاري
رفض يوسف الفهري واعلن الحرب عليه
وقبل الحرب خاف اليمنيون ان يهرب عبدالرحمن بن معاويه من الحرب ويتركهم في مواجهة الفهريين
ولكنه ثبتهم بطريقه بتعبر عن مدي عبقريته بس مش موضوعنا
المهم بعد الحرب كسب عبدالرحمن بن معاويه علي يوسف الفهري
هرب الفهري ومن تبقي معه
وكانت العادات زمان ان الجيش اللي بيكسب بيلاحق الجيش اللي بيخسر لحد ما يخلص عليه
زي ما عمل بيبرس وقظز مع التتار
معظم الناس كانت بتكلم علي معركة عين جالوت
طبعا تستحق لانها كانت مجزره
اللي يعرف احداثها وخصوصا لما قطز نفذ خططته وعرف التتار انهم محصورين
ولا مخرج لهم الا السيف
محدش طبعا يعرف هما عملو ايه
احسن لو عرفتوا اللي حصل مش هتستحمل انك تتخيل
بس بعد الميمنه التتريه فرتكت الميسره المسلمه وقدر يهرب شوية
وخلاص المسلمين كسبو بس قرروا انهم يجروا وراهم
حصلت معركه تانيه عند ارض بيسان علي بعد 20كم من عين جالوت
اجمع المؤرخون علي انها أصعب من المعركة الاولي
لانها كانت معركة البقاء للجيش الذي لا يقهر الذي سيطر علي نصف الكرة الارضيه في اقل من 40 سنه
انا متخيل ايه اللي حصل وازاي المسلمين قدروا يخلصو علي الجيش كله
يعني متبقاش ولا واحد فيه زي معركة الزلاقه بالظبط
بيبرس ده كان مفتري هو وقظز كانو زي ميسي وتشافي كده
ااااااااااااه
المهم بعد ما قرر اليمنيين انهم يلاحقوا الفهريين ويخلصوا عليهم
وقفهم عبدالرحمن بن معاويه وقالهم كلمات تكتب بماء من ذهب
وهو لب الموضوع ده
نعم الشاب انت يا بن معاويه
قالهم

لا تتبعوهم ... اتركوهم ... لا تستأصوا شأفة أعداء
ترجون صداقتهم
واستبقوهم لأشد عداوة منهم

معندهوش اي عنجهيه مصريه ولا نفخه كدابه ولا كبرياء الفراعنه ولا اي حاجه من اللي بنشوفها دي
عنده هدف محدد وبيسعي لتحقيقه
حاولوا تقارنو الجملتين اللي فاتوا دول باللي بيحصل في النظام السابق كده
شوف مدي تفاهة الشعب اللي مضيع وقته في ميدان التحرير
والشباب اللي موجه اهتمامه لحاجات هو ميعرفش ابعادها اساسا
والمنتجين اللي مضيعين فلوسهم في انتاج برامج يتريقوا ع النظام السابق
مضيع وقته في انه يطلع لك فيلم وثائقي فكرته ان مبارك رئيس بالصدفه وانه ذكائه محدود
يا لهوي علي اللي بيحصل
كل واحد الصغير قبل الكبير فاكر نفسه ابوالعريف وفاهم كل حاجه ويطلع يقول ويعيد ويزيد
هو اساسا اتحدي اللي جابوه انه يعرف المعني اللغوي لكلمة فلول اساسا
ومفرد فلول دي فل بفتح الفاء او ضمها او كسرها
والله اتحداه
ويقولك مجلس عسكري ومجلس ظابط وهو ميعرفش حاجه
واحد كل علاقته بالسياسه انه بيسمع ناس كتير بتتكلم في السياسه
والاعلام والاعلاميين اللي اقسم بالله ما بيدور غير علي مجد اعلامي وشهره شخصيه
ش خ ص ي ه
استثني عمرو الليثي وفقط حتي انه لا يخرج عن القطيع
موضوع بدأت اكتبه من فتره كده عن الحكم عن الرئيس
اول جريدة المصري اليوم اجيبها بعد ما بدأت اكتب في الموضوع
لاقيتهم كاتبين عن روح التسامح التي يجب ان يتحلي بها الشعب قبل القانون
الموضوع كان جامد
اي نعم مكنش مغطي كل ابعاد فكرتي بس كويس انه في واحد غيري فكر في كده
سكيت عن الموضوع ولكن
يا تافه منك ليه لما يقتلو الرئيس هتستفاد ايه
هيعملو ام علي ويوزعوها عليك
وعينك علي ام علي ومش خايف من علي اللي هيشوف امه مع حد هيخربها
المشكله انه مش هيرتاح النار اذا لم تجد ما لم تأكله اكلت نفسها
انا شايف ان الناس دي لو اتعاملو بالحسني هتطلع منهم بمعلومات ممكن تزق البلد خمسين سنه قدام مره واحده
وحلول لشوية مشاكل قديمه كانت معاهم ومنفذوهاش ورؤيه وعلاقات واسرار وخبايا ومفاتيح ضايعه للبلد
هتاخد وقت كبير لما توصل لها
فين نقاط القوه اللي ممكن تلعب بيها وفين نقاط الضعف اللي لازم تتجنبها
ومين عدوك ومين حبيبك ومين المنافق ومين الكريم ومين البخيل
و...و...و...و...
حاجات مكنش يعرفها غير اللي قاعد فوق
زائد يافلح منك ليه امر عقاب للملك ممكن تعاقبه بيه
انه ميبقاش ملك
واحساسه انه مواطن عادي كده
ماهو محدش فيكم داق السلطان ولته وشقوته
كمان روح التسامح دي عمرك ما هتروح ولا هتيجي من غيرها
بجد مش عارف اتكلم
رحمك الله يا عبدالرحمن بن معاويه بن الوليد بن عبدالملك
يا عبدالرحمن الداخل
يا صقر قريش


ملحوظه
حاجه واحده ممكن تكتشفوها في الموضوع ده
انكم متعرفوش تاريخ كويس